(SAJAK)

JEMPLING



Neuteup langit nu angkeub
Ngalunan halimun nu patuntun-tuntun
Aya gereget nu imeut, aya kanyeri nu nyamuni
Basa nyawang lamunan nu kungsi ngalun sapajaratan rasa.
Lebah mana purwacarita éndah?
Sajajalan ukur rumpaka-rumpaka tunggara

Jempling ngabelentrang lebaheun ceuli
Patung panineungan gugupay ipis
Ukur katembong imut-imut sombong.

Gening, jajantung téh lumukut sangka
Sagurat-sagurat kamelang mubyar lebaheun angen
rasa nu kiwari geus cacap lebah pangbelokan haté


Keretas-keretas calangap bangun halahab nunggu keclak aksara
minuhan lolongkrang pikiran
Bodas-hideung ngadodoho,
Silih usik, silih tarung lebah dada
Ngelebét-ngelebét bandéra jeung madhab nu baheula ngalalakon

Lebah mana Lampu nu baranang?
Kalebah mana rusiah diteuleum ?
Kiwari ukur nunggu girimis nu miripis ninggangan haté
Sabot anteng ngahuleng dipiring asmarandana.



Ule Tarusbawa

SULING

Suling degung jirimna sarimbag jeung suling kawih atawa suling tembang. Nu ngabédakeunana tina jumlah liangna, ukurun jeung cara metakeunana. Warugana diwangun ku suliwer nya éta papaés hulu suling nu ogé mibanda pungsi keur nutupan bagéan luar liang tiup, liang paragi niup anu di sebut heunceut careuh, gagang jeung liang sora. Luyu jeung ngarana, larasna ogé laras degung. Bahana tina awi tamiang sedeng suliwerna tina awi sesebitan. Ari ukuranana leuwih pondok batan suling kawih.Cara maenkeunana ku cara ditiup, anu minangka keur pangatur nadana ku leungeun. Leungeun katuhu diluhur leungeun kénca dihandap. Metakeunana, liang di buka kabeh bakal kaluar nada Da (1), ditutup liangna anu luhur kaluar nada Mi (2), ditutup dua liang anu luhur kaluar nada Na (3), ditutup tilu liang ti luhur kaluar nada Ti (4), jeung mun ditutup liangna kabéh bakal kaluar nada La (5).téknik niupna ku cara dilamus. Téknik metakeun leungeun aya ku cara dipacok (pikeun sora anu pondok tur seukeut), dipuruluk (pikeun sora anu ngageter), leotan (pikeun sora anu ngagaléong). Suling degung pungsina keur nungtun lagu jeung meulit lagu katut ngantebkeun melodi. Saéméh degung dikawihan, pungsina suling keur ngeusian jeung mapaés gending.